எட்ஜ் நோட் (Edge Node)

 எட்ஜ் நோட் (Edge Node)

ஸ்மார்ட்ஃபோன் காலி! இனி எல்லாம் எட்ஜ் நோட் (Edge Node) மயம்!

செயலிகள் (Apps) அற்ற, இயங்குதளங்கள் (Operating Systems) அற்ற, இடைவிடாத ஸ்க்ரோலிங் தொல்லைகளற்ற உலகத்திற்குள் நாம் நுழைந்து கொண்டிருக்கிறோம். நம் வாழ்வின் அங்கமாகிவிட்ட "ஸ்மார்ட்போன்" மறையத் துவங்கி விட்டது. அதற்குப் பதிலாக நம் கைகளில் எட்ஜ் நோட் (Edge Node) வரப்போகிறது. 

எட்ஜ் நோட் என்றால் என்ன?

​தூரத்திலிருக்கும் ஒரு சர்வர் நம் கோரிக்கையைச் செயல்படுத்தும் வரை நாம் காத்திருக்க வேண்டிய அவசியமில்லை. நம் கையில் உள்ள சாதனமே இனி ஒரு சிறிய "மினிகம்ப்யூட்டர்" போலாகிவிடும். (Raspberry Pi போன்ற ஹார்டுவேர் மூலம் இயங்குவது). இது தரவுகளை அது உருவாகும் இடத்திலேயே உடனுக்குடன் கையாளும். 5G தொழில்நுட்பம் இதன் நரம்பு மண்டலம் போலச் செயல்படுவதால், மின்னல் வேகத்தில் வேலை செய்யும். இதற்கு எந்தவொரு "மனித இடைமுகமும்" (No Human Interface) தேவையில்லை. அதாவது நீங்கள் ஒவ்வொரு முறையும் "Approve" அல்லது "Open" என்று கிளிக் செய்ய வேண்டியதில்லை. அதுவே தானாகச் செயல்படும்.

தற்போதுள்ள ஸ்மார்ட்போனுக்கும் (Smartphone), வருங்கால எட்ஜ் நோட் (Edge Node) தொழில்நுட்பத்திற்கும் இடையிலான முக்கிய வித்தியாசத்தை இரண்டு புள்ளிகள் மூலம் விளக்கலாம்.

​முதலாவதாக, செயல்பாட்டுத் தன்னாட்சி (Local Autonomy). இன்றைய ஸ்மார்ட்போன்கள் பெரும்பாலும் "கிளவுட்" (Cloud) எனப்படும் தொலைதூர சர்வருடனேயே இணைக்கப்பட்டுள்ளன. உதாரணமாக, நீங்கள் 'Siri' அல்லது 'Google Assistant'-இடம் ஒரு கேள்வி கேட்டால், உங்கள் குரல் இன்டர்நெட் வழியாக எங்கோ இருக்கும் ஒரு பெரிய கம்ப்யூட்டருக்குச் சென்று, அங்குப் பதில் உருவான பிறகே உங்கள் போனுக்குத் திரும்பும். ஆனால், எட்ஜ் நோட் என்பது அதன் சொந்த "மூளையை" (Processor) உள்ளேயே வைத்திருக்கும். இது இன்டர்நெட் இல்லையென்றாலும், தகவல்களைத் தன்னிச்சையாகவும் உடனடியாகவும் அந்த இடத்திலேயே கையாளும்.

​இரண்டாவதாக, மனிதத் தலையீடு இல்லாமை (No Interface/Agentic). ஸ்மார்ட்போனில் நீங்கள் ஒரு வேலையைச் செய்ய வேண்டுமென்றால், நீங்களே செயலியைத் (App) திறந்து, கட்டளைகளைக் கொடுக்க வேண்டும். இங்கே நீங்கள்தான் மேலாளர். ஆனால், எட்ஜ் நோட் ஒரு "ஏஜென்ட்" போலச் செயல்படும். இதற்குத் திரையோ பட்டன்களோ தேவையில்லை. உங்களைச் சுற்றியுள்ள சூழ்நிலையை 5G மற்றும் சென்சார்கள் மூலம் அதுவே உணர்ந்து, நீங்கள் சொல்லாமலேயே உங்களுக்கான வேலையைச் செய்து முடிக்கும். உதாரணமாக, உங்கள் மீட்டிங் நேரத்தை அறிந்து அதுவே கதவைத் திறப்பது அல்லது வாகனத்தை முன்பதிவு செய்வது என ஒரு மனிதப் பங்களிப்பு இல்லாமல் பின்னணியில் இயங்கும் தன்னாட்சி கொண்ட கருவியாக இது இருக்கும்.

சபாஷ் . ஆனால் நமக்கு எழும் அடுத்தக் கேள்வி,தரவு பாதுகாப்பு (Data Protection)? உங்கள் தகவல்கள் அனைத்தும் அந்தச் சாதனத்திலேயே (Edge) கையாளப்படுவதால், அவை பொதுவான இணையத்திற்குச் செல்ல வேண்டிய அவசியமில்லை. ஹார்டுவேர் சிப்கள் மற்றும் ரகசிய 5G வழிகள் மூலம் உங்கள் தகவல்கள் ஹேக்கர்களிடமிருந்து பாதுகாக்கப்படுகின்றன.

​இதற்கு ஒரு சிறந்த எடுத்துக்காட்டைச் சொல்கிறேன்.

அல்பேனியாவில் இந்த "மனிதத் தலையீடு இல்லாத" தொழில்நுட்பத்தை அவர்கள் நேரடியாக அரசாங்கத்திற்கே கொண்டு வந்துவிட்டனர். உலகிலேயே முதல் AI அமைச்சர் "டியெல்லா" (Diella). ஆம் 2024-ல் ஒரு சாதாரண மெய்நிகர் உதவியாளராகத் தொடங்கப்பட்ட இவர், செப்டம்பர் 2025-ல் அமைச்சரவையில் சேர்க்கப்பட்டார். அரசு ஒப்பந்தங்களில் நடக்கும் ஊழல்களை ஒழிக்க, மனிதத் தலையீடு இன்றி முடிவெடுப்பதே இவரது பணி.

​அல்பேனியப் பிரதமர் எடி ராமா, டியெல்லாவிற்கு 83 டிஜிட்டல் குழந்தைகள் (AI உதவியாளர்கள்) இருப்பதாக அறிவித்துள்ளார். இந்த உதவியாளர்கள் ஒவ்வொரு நாடாளுமன்ற உறுப்பினருக்கும் சட்டம் மற்றும் விவாதங்களைத் தொகுத்து வழங்குகிறார்கள். ஆனால் இந்த அமைப்பில் மனித இடர்பாடு இன்னும் முழுமையாக விலக்கப்படவில்லை! அடியா பிர்தேனி (Adea Pirdeni) என்ற "மனித" அமைச்சரே இந்த முழு அமைப்பையும் கட்டுப்படுத்துகிறார். AI வேலைகளைச் செய்யும்போது, அது சட்டப்படி நடக்கிறதா என்பதை இவர் உறுதி செய்கிறார்.

எட்ஜ் நோட்கள் (Edge Nodes) ஒன்றோடு ஒன்று பேசுவதையும், தங்களைத் தாங்களே மேம்படுத்திக் கொள்வதையும் கூட்டு கற்றல் (Federated Learning) என்றழைக்கிறார்கள். இது மனிதத் தலையீடு இல்லாமல் ஒரு சமூகம் போலச் செயல்படும் முறை:

​1. அறிவைப் பகிர்தல் (Sharing Knowledge, Not Data):

ஒவ்வொரு எட்ஜ் நோடும் (உதாரணமாக ஒரு Raspberry Pi) தனித்தனியாகத் தகவல்களைச் சேகரிக்கும். ஆனால், அது தான் பார்த்த ரகசியத் தகவல்களை (புகைப்படங்கள் அல்லது தனிப்பட்ட தரவுகள்) யாருக்கும் அனுப்பாது. மாறாக, அந்தத் தகவலிலிருந்து தான் கற்றுக்கொண்ட "பாடத்தை" (Mathematical updates) மட்டும் 5G வழியாக ஒரு பொதுவான சர்வருக்கு அனுப்பும்.

​2. உலகளாவிய மூளை (Global Brain Update):

அந்தப் பொதுவான சர்வர், உலகெங்கிலும் உள்ள ஆயிரக்கணக்கான எட்ஜ் நோட்களிடமிருந்து வரும் சிறிய பாடங்களை ஒன்றிணைத்து, ஒரு "மாஸ்டர் மூளையை" உருவாக்கும். பின்னர், அந்த மேம்படுத்தப்பட்ட புதிய அறிவை மீண்டும் அனைத்து எட்ஜ் நோட்களுக்கும் அனுப்பி வைக்கும்.

​அல்பேனியாவின் 83 டிஜிட்டல் உதவியாளர்களும் (டியெல்லாவின் குழந்தைகள்) இப்படித்தான் வேலை செய்கின்றன. ஒரு எம்.பி-க்கு (MP) உதவும் ஒரு நோட் ஒரு புதிய சட்ட நுணுக்கத்தைக் கற்றுக்கொண்டால், அந்த அறிவை மட்டும் மற்ற 82 உதவியாளர்களுக்கும் பகிர்ந்து கொள்ளும். இதனால் ஒரு உதவியாளர் கற்றுக்கொள்ளும் விஷயம், அடுத்த நொடியே மற்ற அனைவருக்கும் தெரிந்துவிடும்.

​சுருக்கமாகச் சொன்னால், இங்கே ஒரு நோட் செய்யும் தவறு அல்லது கற்கும் பாடம், ஒட்டுமொத்த நெட்வொர்க்கையும் புத்திசாலியாக்குகிறது. இதற்கு ஒரு மனிதன் உட்கார்ந்து புரோகிராம் செய்ய வேண்டிய அவசியமில்லை; அவை 5G வேகத்தில் தங்களுக்குள் உரையாடிக்கொண்டே வளர்கின்றன.

​இனி நாம் தொழில்நுட்பத்தை இயக்குபவர்கள் அல்ல, தொழில்நுட்பமே நம் தேவைகளை உணர்ந்து இயங்கும் யுகத்தில் நாம் நுழைந்து கொண்டிருக்கிறோம். 2030-களில் உங்கள் கையில் இருக்கும் சாதனம் ஒரு ஃபோனாக இருக்காது அது உங்களின் டிஜிட்டல் நிழலாக இருக்கும்.

இந்த பிரபஞ்சத்தைப் பற்றிய எனது புரிதலின்படி, பரிணாம வளர்ச்சி நம்மை ஒரு 'தன்னாட்சி பெற்ற உயிரினமாக' (Autonomous Being) மாற்றிக் கொண்டிருக்கிறது. அதாவது, நிறுவனங்கள் (Institutions), சமூகம் போன்ற பழைய கட்டமைப்புகளுக்குள் முடங்கிக் கிடக்காமல், பிரபஞ்சத்தின் எல்லையற்ற தகவல்களோடும், புற வெளியோடும் நேரடியாகத் தொடர்புகொண்டு அவற்றை இயக்கும் வல்லமை பெற்றவர்களாக நாம் மாறுகிறோம்