தீபாவளிக்கு முன்னர் வரும் பௌர்ணமியில் இருந்து அடுத்து வரும் பௌர்ணமி வரையுள்ள மாதத்தை தாமோதர மாதம் என்றும், மாலைப்
பொழுதில் நெய் தீபம் ஏற்றி, சுவையான பண்டங்களை தயாரித்து நிவேதனம் பண்ணி, தாமோதராஷ்டகம் எனும் எட்டு பாடல்களை பாடி வழிபடுகின்றனர்.
பக்தியுடையவர்களுக்கு மிக எளிதாக அடையப்படக்கூடியவன். அல்லாதோருக்கு அடைய முடியாதவன். எல்லோரும் விரும்பும் மலர்மகளான இலக்குமியால் விரும்பப்படுபவன். அவளின் தலைவன். அப்படிப்பட்டவன் கடைந்தெடுத்த வெண்ணெய்யை திருடியதற்காக கட்டுப்பட்டான்.
அதுவும் வயிற்றிலே கட்டுப்பட்டுள்ளான்?
அந்த வயிறு எப்படிப்பட்டது?
ஊழிக் காலத் தில் அத்தனை உயிர்களையும் தன்னுள்ளே அடக்கி சிருஷ்டிப்புக் காலத்தில் பிறப்பிக்க வைப்பது. அந்தோ என்ன எளிமை அன்னை யின் பிடிக்குட்பட்டு கட்டுப்பட்டான் அவன் கயிற்றால் கட்டப்படவில்லை தாய்ப்பாசத்தினால் கட்டுப்பட்டான்.
தீபாவளிக்காலம் அன்னை யசோதை ஒருநாள் அதிகாலை அடுப்பில் பாலை வைத்துவிட்டு தயிர் கடையும் பணியில் ஈடுபட்டுக் கொண்டிருந்தாள். கண்ணன்
வந்து மடியில் ஏறி பால் குடிக்க வேண்டுமென்றான். வயிறு
நிரம்பவில்லை. அவனை விட்டுவிட்டு அடுப்பில் இருந்த பாலை கவனிக்க ஓடினாள்.
கண்ணணுக்கு கோபம் வந்து விட்டது. தயிர்ச்சட்டியை உடைத்து விட்டு உறியில் இருந்து வெண்ணெய்யை எடுத்துக் கொண்டு ஓடிச்சென்று உரலைக் கவிட்டு வைத்து அதன் மேல் உட்கார்ந்து கொண்டு குரங்குகளுக்கு வெண்ணெய்யை ஊட்டிக்கொண்டிருந்தான்.
அன்னை திரும்பி வந்து தயிர்ச்சட்டி உடைந்திருப்பதைக் கண்டு,
“இது என் கிருஷ்ணனின் வேலையாகத்தான் இருக் கும்” என்று கையில் தடியைக் கொண்டு அவனைத் தேடிச்சென்றாள். அன்னையின் கையில் தடியைக்கண்டு பயந்தவன் போல் ஓடத் தொடங்கினான். அனைவரும் கண்டு அஞ்சும், யமனே பயப்படும் எம்பெருமான் கண்ணன் அன்னையின் கரங்களில் இருக் கும் தடிக்குப் பதறிப்போய் ஓடினான்.
அன்னையும் ஓடினாள். யோகிகளாலும் ஞானிகளாலுமே பிடிக்க முடியாத கண்ணபரமாத்மாவை அவளால் பிடிக்க முடியவில்லை. களைத்துபோய் விட்டாள். அன்னைக்கு இரங்கி இறுதியில் தானே பிடிபட்டான்.
“உன் குறும்புக்கு உன்னைக் கட்டிப்போடுகிறேன் பார்” என்று
கயிற்றை எடுத்தாள். கயிறு
இரண்டு அங்குலத்தால் குறைந்தது வேறு கயிறுகளையும் முடிச்சுப்போட்டு கட்டினாள். ஒவ்வொரு முறையும் அது இரண்டு அங்குலத்தால் குறைந்தது. கோபிகளும் அன்னையும் அதிசயித்தார்கள்.
இவனைக்கட்ட முடியாது என்று விட்ட போது, “அம்மா
என்னைக் கட்டு” என்று
கூறினாரே அந்தப் பரம்பொருள் கண்ணன். உடனே
கட்டக் கூடியதாக இருந்தது. வயிற்றிலே கட்டப்பட்டு தாமோதரன் எனும் பெயரையும் பெற்றார். தாய்ப் பாசத்தினால் கட்டுண்ட தாமோதர லீலையை நினைக்கும் போது என்ன தோன்றுகிறது?
கீதையில் வேதங்களைக் கற்பதாலோ, கடுந்தவங்களைச் செய்வதாலோ தானங்களைக் கொடுப்பதாலோ, வழிபாடு செய்வதாலோ என்னை உள்ளபடி உணர முடியாது; அடையமுடியாது;
கலப்பற்ற பக்தித் தொண்டினாலே மட்டும் தான் என்னைப் பற்றிய உண்மையை உணரவும், என்னை அடையவும் முடியும் என்று காட்டுகிறான் நமக்கு!!
தூய அன்பினால் மட்டுமே அவனைப் பிடிக்கவும் நம்முடன் இணைக்கவும் முடியும் என்பது தெளிவாகிறது
ஒவ்வொரு வீடுகளிலும் இது கொண்டாடப்பட வேண்டியது. அனுஷ்டித்து அனுபவிக்க வேண்டிய லீலை தாமோதர லீலை.
ஹரே கிருஷ்ண கிருஷ்ணா!!
ஸ்ரீ க்ருஷ்ணா உன் திருவடிகளே சரணம் !
No comments:
Post a Comment