ஏன் கலைஞர் கொண்டாடப்படுகிறார்?

 ஏன் கலைஞர் கொண்டாடப்படுகிறார்?

பல நூறு காரணங்களில் ஒரு சில!

*கலைஞர் கருணாநிதியின் பிறந்தநாள் தமிழ்நாடு முழுவதும் கொண்டாடப்படுகிறது. கலைஞர் ஏன் கொண்டாடப்படுகிறார் என்று கேட்டால் அவர்களுக்கு சொல்ல எவ்வளவோ காரணங்கள் இருக்கின்றன. அவற்றில் சிலவற்றை பார்க்கலாம்.*

*கலைஞர் கருணாநிதி பிறந்தநாளை (ஜூன் 3) சென்னை மாநகர் முதல் கடைக்கோடி கிராமம் வரை மக்கள் கொண்டாடுவதற்கான காரணம் என்ன?* *மதவெறி, பாசிசம், ஆகியவற்றை முன்னிறுத்துவோருக்கு ஏன் கலைஞர் என்ற பெயர் இன்றும் கசக்கிறது?* *ஆகிய கேள்விகளுக்கு விடை தேட முற்பட்டால் தமிழ்நாட்டின் வரலாற்றையும், அதன் வளர்ச்சியையும், தனித்துவத்தையும் புரிந்துகொள்ள முடியும்.*

 

*மிக மிக ஒடுக்கப்பட்ட ஒரு சமூகத்திலிருந்து கிளம்பி ஒடுக்கப்பட்ட அத்தனை பேரின் பிரதிநிதியாக போரிட்டு உரிமைகளைப் பெற்றுக் கொடுத்தவரும், அதற்கான வழியை கற்றுக் கொடுத்தவரும் கலைஞர் தான்.*

 

*தமிழ்நாடு பிற மாநிலங்களை விட பல்வேறு தளங்களில் முன்னணி மாநிலமாக இருக்கிறது, நீடித்த நிலைத்த வளர்ச்சி இங்கு சாத்தியமாகியிருக்கிறது, முக்கியமாக இந்த நிலம் மதவெறியை கால் ஊண்ற விடாமல் தடுத்து வருகிறது..* *இது எப்படி நடந்தது என்று கேட்டால் கலைஞர் ஆட்சியில் இருந்து முன்னெடுத்தவையும், எதிர்கட்சி தலைவராக இருந்து ஆட்சியாளர்களை முன்னெடுக்க வைத்ததும் தான் காரணமாக இருக்க முடியும்.*

 

*கலைஞர் ஆட்சிக்கு வந்த 1969ஆம் ஆண்டிலிருந்து 1976 வரை தமிழ்நாட்டு வளர்ச்சிக்காக இளமைத் துடிப்ப்புடன் அவர் நட்ட விதைகள் இன்று விருட்சமாய் வளர்ந்துள்ளன.* *இப்போதும்கூட பல மாநிலங்களில் இல்லாத பல முக்கியத் திட்டங்களை 50 ஆண்டுகளுக்கு முன்னரே நடைமுறைக்கு கொண்டுவந்தவர் கலைஞர்.*

 

*பிச்சைக்காரர்கள் மறுவாழ்வு திட்டம், இலவச கண்ணொளி வழங்கும் திட்டம், குடிசை மாற்று வாரியம், சுற்றுலா வாரியம், குடிநீர் வடிகால் வாரியம் போன்றவற்றை உருவாக்கியது கலைஞர்.*

 

*ஆதிதிராவிடர் இலவச கான்கிரீட் வீட்டு வசதி திட்டம், சிங்காரவேலர் நினைவு மீனவர் இலவச வீட்டு வசதி திட்டம், பிற்படுத்தப்பட்டோர், மிகவும் பிற்படுத்தப்பட்டோருக்கான தனி அமைச்சகம், பிற்படுத்தப்பட்டோர் நல குழு அமைத்து பிற்படுத்தப்பட்டோர் மற்றும் ஆதிதிராவிடர் இட ஒதுக்கீடுகளை உயர்த்தியது, பேருந்துகள் நாட்டுடைமை, போக்குவரத்து கழகங்கள் உருவாக்கம், அனைத்து கிராமங்களுக்கும் மின் இணைப்பு திட்டம், விவசாய தொழிலாளர்களுக்கு குடியிருப்பு மனை உரிமைச் சட்டம், சேலம் உருக்காலை திட்டம்..*

 

*15 ஏக்கர் நில உச்சவரம்புச் சட்டம், ஒரு லட்சத்து 78 ஆயிரத்து 880 ஏக்கர் நிலம் மீட்கப்பட்டு ஒரு லட்சத்து 37 ஆயிரத்து 876 விவசாயிகளுக்கு வழங்கியது, சிப்காட் தொழில் வளாகங்கள், பூம்புகார் கப்பல் போக்குவரத்துக் கழகம், ஆதரவற்ற குழந்தைகளுக்கு திருக்கோயில்களில் கருணை இல்லங்கள் உருவாக்குதல், கை ரிக்‌ஷாக்களை ஒழித்து சைக்கிள் ரிக்ஷாக்கள் வழங்கும் திட்டம், மாற்றுத்திறனாளிகள் மறுவாழ்வு திட்டம், அஞ்சுகம் அம்மையார் நினைவு கலப்புத் திருமண சட்டம், அரசு ஊழியர்களுக்கு குடும்ப பாதுகாப்பு திட்டம், பணிக்காலத்தில் உயிரிழக்கும் அரசு ஊழியர் வாரிசுக்கு கருணை அடிப்படையில் அரசுப் பணி, டாக்டர் தர்மாம்பாள் அம்மையார் நினைவு விதவை மறுமண திட்டம், மாநில திட்ட குழு உருவாக்கம், காவல் ஆணையம் அமைத்தல்.*

 

*தமிழக அரசு ஊழியர்களுக்கு மத்திய அரசு ஊழியர்களுக்கு இணையான ஊதியம், பொங்கல் முன்பணம் உள்ளிட்ட சலுகைகள், பெண்களுக்கு சொத்துரிமை வழங்கிட தனிச் சட்டம், ஏழைப் பெண்கள் பயன்பெறும் மூவலூர் ராமாமிர்தம் அம்மையார் நினைவு திருமண உதவித்திட்டம், ஈவேரா நாகம்மையார் நினைவு மகளிர் இலவச பட்டப்படிப்பு திட்டம், ஆதிதிராவிடர் மிகவும் பிற்படுத்தப்பட்டோர் வருமான வரம்புக்கு உட்பட்ட பிற்படுத்தப்பட்டோரின் பெண்களுக்கு பட்டப்படிப்பு வரை இலவசக் கல்வி, பின்னர் இது முதுகலை பட்டப்படிப்பு வரை இலவசக் கல்வியாக மாற்றியமைக்கப்பட்டதும் கலைஞரின் ஆட்சி காலத்தில்தான்.*

 

*கர்ப்பிணி தாய்மார்களுக்கு நிதியுதவி வழங்கும் டாக்டர் முத்துலட்சுமி ரெட்டி நினைவு மகப்பேறு நிதியுதவித் திட்டம், மகளிர் திட்டத்தின் மூலம் மாநிலமெங்கும் மகளிர் சுய உதவிக்குழுக்கள், வன்னியர் சீர்மரபினர் உட்பட மிகப்பிற்படுத்தப்பட்டோர் 20 விழுக்காடு தனி இட ஒதுக்கீடு, ஆதிதிராவிடர்களுக்கு மட்டும் 18 விழுக்காடு இட ஒதுக்கீடு நிர்ணயித்து பழங்குடி இனத்தவருக்கு ஒரு விழுக்காடு தனி இட ஒதுக்கீடு, மகளிருக்கு அரசு வேலைவாய்ப்பில் 30 விழுக்காடு இட ஒதுக்கீடு, விவசாயிகளுக்கு இலவச மின்சாரம், நேரடி நெல் கொள்முதல் நிலையங்கள் அமைத்தல் உள்ளிட்ட பல்வேறு திட்டங்களை முன்னெடுத்தார்.*

 

*உயர்கல்வித்துறை உருவாக்கம், நெடுஞ்சாலைத்துறை உருவாக்கம், தகவல் தொழில்நுட்பத்துறை உருவாக்கம், சமூக சீர்திருத்தத் துறை உருவாக்கம், இளைஞர் நலன் மற்றும் விளையாட்டுத் துறை உருவாக்கம், சென்னையில் டைடல் பூங்கா அமைக்கப்பட்டது, உள்ளாட்சி அமைப்புகளில் மகளிருக்கு 33 விழுக்காடு இட ஒதுக்கீடு, பெரியார் நினைவு சமத்துவபுரம் திட்டம், உழவர் சந்தைத் திட்டம் வருமுன் காப்போம் திட்டம், கால்நடை பாதுகாப்பு திட்டம், பள்ளிகளில் வாழ்வொளித் திட்டம், விவசாய தொழிலாளர் நல வாரியம், தொழிலாளர் நலனுக்கு என தனித்தனி நல வாரியங்கள், தாய் மொழி வளர்ச்சிக்கு தனி அமைச்சகம், போக்குவரத்து தொழிலாளர்களுக்கு ஓய்வூதிய திட்டம்,*

 

*தென் குமரியில் 133 அடி உயர அய்யன் திருவள்ளுவர் சிலை, ஆட்சி பொறுப்பேற்ற 6 மாதங்களுக்குள் தடைபட்டு கிடந்த உள்ளாட்சி அமைப்புகளுக்கும் கூட்டுறவு அமைப்புகளுக்கும் தேர்தல், கிராமங்கள் தோறும் சிமெண்ட் சாலைகள், வரலாறு காணாத வகையில் ஆறு குளம் உள்ளிட்ட நீர்நிலைகளை தூர்வாரும் திட்டம், சட்டமன்ற உறுப்பினர் தொகுதி மேம்பாட்டுத் திட்டம், கிராமப்புற பெண்களுக்கு தொழில் கல்லூரி, தொழிற் கல்லூரிகளில் 15 விழுக்காடு இட ஒதுக்கீடு, கிராமப்புறங்களுக்கு மினிபஸ் திட்டம், சென்னை கோயம்பேட்டில் ஆசியாவிலேயே மிகப்பெரிய பேருந்து நிலையம், சேமிப்புடன் கூடிய மகளிர் சிறு வணிக கடன் திட்டம், பள்ளி குழந்தைகளுக்கு சத்துணவுடன் முட்டை வழங்கும் திட்டம், மதுரை மாநகரில் உயர்நீதிமன்ற மதுரைக்கிளை அமைக்கப்பட்டது, மாணவர்களுக்கு இலவச பேருந்து பயண அட்டை வழங்கப்பட்டது, அண்ணா மறுமலர்ச்சித் திட்டம், 10,000 சாலை பணியாளர்கள் நியமனம், 13,000 மக்கள் நலப் பணியாளர்கள் மீண்டும் நியமனம்.*

 

*தொழில் படிப்புகளுக்கான நுழைவுத் தேர்வு ரத்து, சென்னை, கோவை, திருச்சி, நெல்லை, மதுரை ஆகிய இடங்களில் ஐந்து புதிய அண்ணா தொழில்நுட்ப பல்கலைக் கழகங்கள், ஒரத்தநாடு, பெரம்பலூர், சுரண்டை, குளித்தலை, லால்குடி, மேட்டூர், புதுக்கோட்டை, தேனி, திருவண்ணாமலை, விழுப்புரம், பெண்ணாகரம், திருப்பத்தூர், வேதாரண்யம் ஆகிய 14 இடங்களில் அரசின் புதிய கலை அறிவியல் கல்லூரிகள், மாவட்டத்திற்கு ஒரு மருத்துவக் கல்லூரி கோட்பாட்டின்படி விழுப்புரம், திருவாரூர், தர்மபுரி, சிவகங்கை, பெரம்பலூர், திருவண்ணாமலை ஆகிய இடங்களில் ஆறு புதிய மருத்துவக் கல்லூரிகள், 12 மாவட்டங்களில் புதிதாக அரசு பொறியியல் கல்லூரிகள், அரசு ஊழியர்களுக்கு புதிய மருத்துவ காப்பீட்டுத்திட்டம், நலமான தமிழகம் திட்டம்,*

 

*இலவச அமரர் ஊர்தி சேவை திட்டம், இஸ்லாமியர்களுக்கு 3.5 விழுக்காடு தனி இட ஒதுக்கீடு, அருந்ததியர் சமூக மக்களுக்கு 3 விழுக்காடு தனி உள் ஒதுக்கீடு, அனைத்து சாதியினரும் அர்ச்சகராகும் சட்டம் நிறைவேற்றப்பட்டு பல்வேறு சாதிகளையும் சார்ந்த 216 பேருக்கு அர்ச்சகர் பயிற்சிகள் அளிக்கப்பட்டது, பெரியார் நினைவு சமத்துவபுரம், அண்ணா நூற்றாண்டு நினைவு நூலகம், அடையாறு தொல்காப்பிய பூங்கா, செம்மொழி பூங்கா, கடல்நீரை குடிநீராக்கும் திட்டம், மெட்ரோ ரயில் திட்ட அமைப்பு, ஒகேனக்கல் கூட்டு குடிநீர் திட்டம், ராமநாதபுரம் கூட்டுக் குடிநீர் திட்டம் நிறைவேற்றம், கட்டாய மதமாற்ற தடைச் சட்டம் ரத்து, பறக்கும் சாலை திட்டம் உள்ளிட்ட பல்வேறு திட்டங்களை கலைஞர் அரசு மேற்கொண்டது.*

 

*மேற்குறிப்பிட்டவை கலைஞர் காலத்தில் கொண்டு வரப்பட்ட திட்டங்களின் ஒரு பகுதி மட்டுமே. இன்னும் எண்ணற்ற திட்டங்கள் வரிசை கட்டி நிற்கின்றன. அந்த திட்டத்தினால் பயனடைந்த தமிழக மக்கள் இன்று கலைஞரை நினைவு கூர்ந்து வருகின்றனர். இனிவரும் தலைமுறையும் கலைஞர் புகழ் பாடும்.*

 

 *தகவல்:* *ந. அப்பர் சுந்தரம் தஞ்சாவூர்*